DURRËS – Një ngjarje tragjike ka ndodhur mbrëmjen e së hënës në zonën e Shkëmbit të Kavajës, ku një turiste e huaj ka humbur jetën ndërsa po lahej në det.

Viktima është një grua rreth 76 vjeçe, me shtetësi polake, e cila kishte ardhur për pushime në Shqipëri. Sipas informacioneve paraprake, dyshohet se ajo ka pësuar atak kardiak në momentin që ka hyrë në det, çka ka çuar në mbytjen e saj.

Forcat policore dhe ekipi mjekësor mbërritën në vendin e ngjarjes menjëherë pas sinjalizimit, por për fat të keq ishte tepër vonë për të shpëtuar jetën e turistes.

Autoritetet lokale kanë nisur hetimet për të zbardhur rrethanat e sakta të ngjarjes, ndërsa trupi i viktimës është transportuar për ekspertizë mjeko-ligjore.

Rasti ka ngritur sërish shqetësimin për sigurinë e pushuesve, veçanërisht personave të moshuar, në zonat bregdetare gjatë sezonit turistik.