ROMË – Ministri italian i Arsimit, Giuseppe Valditara, ka njoftuar se nga shtatori 2025 do të hyjë në fuqi një vendim i ri që ndalon përdorimin e telefonave celularë në shkollat e mesme në të gjithë vendin.

Vendimi është marrë në funksion të mbrojtjes së shëndetit mendor dhe përqendrimit të nxënësve, pasi, sipas Ministrisë së Arsimit, studimet shkencore kanë treguar një ndikim negativ në performancën dhe aftësinë për t’u përqendruar të adoleshentëve që përdorin telefonin gjatë mësimit.

“Nuk është një masë ndëshkuese, por një hap drejt përmirësimit të cilësisë së mësimdhënies dhe të jetës shkollore”, tha ministri Valditara në një deklaratë publike.

Përjashtim nga ndalimi do të kenë:
• Nxënësit me aftësi të kufizuara që përdorin pajisjet për komunikim ose mbështetje teknologjike,
• Nxënësit e regjistruar në shkolla me profil teknologjik, ku telefoni përdoret për qëllime edukative.

Masa pritet të ngjallë debat në opinionin publik, ndërsa disa prindër dhe shoqata kanë kërkuar më shumë informacion për mënyrën e zbatimit dhe ndikimin konkret në përditshmërinë e nxënësve.