Forcat Ajrore Izraelite kanë deklaruar se kanë shkatërruar dy avionë luftarakë iranianë të tipit F-14 Tomcat, gjatë një sulmi të përqendruar në një aeroport ushtarak në kryeqytetin iranian. Pamjet e publikuara mbrëmjen e së hënës tregojnë momentet kur avionët goditen dhe shkrumbohen në pistë.

Sipas deklaratës zyrtare të ushtrisë izraelite, avionët ishin pjesë e një operacioni të planifikuar nga Irani për të penguar ndërhyrjet ajrore izraelite në rajon, por u neutralizuan përpara se të ngriheshin.

Avionët F-14 Tomcat, të njohur për përdorimin e tyre në vitet ’70 dhe për famën e fituar në filmat si Top Gun, janë pjesë e flotës së vjetëruar që Irani e trashëgoi nga SHBA përpara Revolucionit Islamik. Ndërkohë, SHBA i ka nxjerrë jashtë përdorimi që prej vitesh.

Ekspertët e mbrojtjes theksojnë se forca ajrore iraniane është e tejkaluar nga teknologjia moderne izraelite, dhe ky sulm vërteton edhe më tej diferencën e thellë në kapacitetet ushtarake mes dy vendeve.

Në të njëjtën deklaratë, Izraeli bëri të ditur se ka siguruar superioritet të plotë ajror mbi Teheranin, duke e cilësuar mbrojtjen ajrore iraniane si “tashmë e shkatërruar”. Kjo sipas autoriteteve izraelite, u jep forcave të saj avantazhin për të goditur objektiva strategjikë me armë konvencionale nga distanca më të afërta dhe me rrezik më të ulët.

Ngjarja shënon një tjetër përshkallëzim të tensioneve mes dy fuqive rajonale, ndërsa vëzhguesit paralajmërojnë se konflikti mes Izraelit dhe Iranit ka hyrë në një fazë të re me rrezik të lartë për destabilizim më të gjerë në Lindjen e Mesme.