Më shumë se 27 mijë maturantë në të gjithë vendin janë ulur sot në bankat e shkollës për të zhvilluar provimin e Matematikës, pjesë e maturës shtetërore 2025. Testimi nisi në orën 10:00 dhe zgjat 2 orë e 30 minuta, por edhe këtë herë procesi nuk i shpëtoi rrjedhjes së informacionit, që tashmë është shndërruar në një fenomen të përsëritur skandaloz.

Vetëm 30 minuta pas fillimit të provimit, në rrjetet sociale janë publikuar imazhe të tezës së Matematikës, duke konfirmuar edhe një herë dështimin e masave për sigurinë e informacionit dhe ruajtjen e integritetit të provimeve.

Ky nuk është rasti i parë që ndodh – në vitet e fundit, thuajse të gjitha provimet e Maturës Shtetërore janë komprometuar brenda pak minutash nga nisja, duke ngritur dyshime serioze për rrjedhje nga brenda sistemit arsimor dhe për mungesë transparence nga institucionet përkatëse.

Deri më tani nuk ka asnjë reagim zyrtar nga Ministria e Arsimit apo QSHA, ndërkohë që rrjetet sociale vijojnë të qarkullojnë pamjet e pyetjeve dhe pretendime për kopjime masive.

Skandali thellon edhe më tej pasigurinë dhe demotivimin te mijëra maturantë, që përballen me një sistem të cilit, gjithnjë e më shumë, i mungon besueshmëria dhe barazia në garë. Rrjedhja e tezës brenda provimit shtron sërish nevojën për një reformim të thellë të procesit të maturës shtetërore, si dhe për ndëshkime konkrete ndaj atyre që shkelin rregullat dhe cënojnë të ardhmen e brezave të rinj.

Për zhvillimin e provimit janë rreth 145 qendra, ku çdo qendër administrohet nga një përgjegjës administrimi dhe nga administratorë të caktuar për çdo mjedis ku zhvillohet provimi.

Për korrigjimin e testeve janë angazhuar më shumë se 640 mësues. Provimet e maturës po zhvillohen në shkolla që plotësojnë kushtet infrastrukturore të përcaktuara në Rregulloren e Maturës Shtetërore.