Pas thirrjes publike të qeverisë iraniane drejtuar qytetarëve që të fshijnë aplikacionin WhatsApp nga telefonat e tyre, kompania Meta – që zotëron WhatsApp, Facebook dhe Instagram – ka dalë me një reagim zyrtar, duke mohuar akuzat e Teheranit.
Irani akuzon, Meta mohon
Autoritetet iraniane kanë pretenduar se të dhënat personale të përdoruesve të WhatsApp-it ndahen me Izraelin, por Meta e ka hedhur poshtë këtë pretendim, duke e quajtur të pavërtetë dhe të rrezikshëm.
“Ne nuk u japim asnjë qeverie informacion në masë,” – tha një zëdhënës i kompanisë, duke shtuar se:
“Meta ka ofruar për më shumë se një dekadë raporte transparence që përfshijnë vetëm rrethana të kufizuara kur kërkohet informacion përmes procedurave ligjore.”
Enkriptim total i mesazheve
Në reagimin e saj, Meta theksoi rëndësinë e enkriptimit nga fillimi në fund të WhatsApp-it, si një garanci për privatësinë e përdoruesve në mbarë botën:
“Të gjitha mesazhet që u dërgoni familjes dhe miqve në WhatsApp janë të enkriptuara nga fillimi në fund, që do të thotë se askush – përfshirë Meta-n – nuk ka qasje në to, përveç dërguesit dhe marrësit.”
Meta e shqetësuar për lirinë e komunikimit në Iran
Meta shprehu shqetësimin se pretendime të rreme si këto mund të përdoren për të legjitimuar bllokime të panevojshme të platformës WhatsApp dhe për të censuruar lirinë e komunikimit në Iran, ku tashmë rrjetet sociale perëndimore janë të ndaluara ose të filtruar gjerësisht.
⸻
Ky zhvillim vjen në një klimë tensioni të lartë gjeopolitik, me rritje të ndërhyrjes së qeverive autoritare në kontrollin e informacionit digjital dhe kufizimin e qasjes së lirë në teknologjitë perëndimore.
