Një incident i rëndë ka tronditur qytetin perëndimor gjerman të Düsseldorfit, ku një shpërthim i parakohshëm i fishekzjarrëve gjatë panairit tradicional “Rheinkirmes” ka lënë të plagosur të paktën 19 persona, katër prej të cilëve ndodhen në gjendje të rëndë.

Ngjarja ndodhi mbrëmjen e së premtes përgjatë brigjeve të lumit Rhein, gjatë një shfaqjeje tradicionale që tërheq mijëra vizitorë çdo vit. Pamjet filmike tregojnë momentin kur fishekzjarrët shpërthejnë në një nivel jashtëzakonisht të ulët, duke shkaktuar panik dhe dëme mes të pranishmëve.

Sipas agjencisë gjermane të lajmeve DPA, mes të lënduarve ndodhet edhe një fëmijë, ndërsa shërbimet zjarrfikëse dhe ekipet e emergjencës reaguan menjëherë në vendngjarje. Autoritetet kanë konfirmuar se policia ka nisur hetimet për të zbardhur shkakun e incidentit, që dyshohet të jetë gabim teknik ose neglizhencë në zbatimin e protokolleve të sigurisë.

“Mendimet tona janë me të prekurit dhe familjet e tyre. Urojmë një shërim të shpejtë për të gjithë të lënduarit. E ndjejmë thellësisht keqardhjen për këtë aksident,” deklaroi zëdhënësi i panairit, Peter Dietlmaier.

Menjëherë pas shpërthimit, organizatorët ndërprenë aktivitetet për ditën e premte dhe kanë njoftuar se po rishqyrtohet përdorimi i fishekzjarrëve në edicionet e ardhshme të panairit.

“Rheinkirmes” është një nga panairet më të mëdha verore në Gjermani, me një histori që daton që nga viti 1316. Aktiviteti zgjat 10 ditë dhe përfshin atraksione të shumta, përfshirë shfaqje me drone, koncerte, si dhe spektakle me fishekzjarrë, të cilat tashmë po kalojnë në fokusin e kritikave për mungesë të standardeve të sigurisë.