Policia e Shtetit ka bërë të ditur se vijon me intensitet të lartë operacioni ndërkombëtar i koduar “The Wanted”, i cili synon kapjen dhe ekstradimin e shtetasve shqiptarë të shpallur në kërkim ndërkombëtar.

Nëpërmjet një njoftimi zyrtar, autoritetet bëjnë me dije se, si rezultat i bashkëpunimit të ngushtë mes Interpol Tiranës, Interpol Abu Dhabi dhe partnerëve në Emiratet e Bashkuara Arabe, pritet që gjatë ditës së sotme të finalizohen procedurat për ekstradimin nga Dubai në Shqipëri të shtetasit shqiptar D. B., 37 vjeç.

I dyshuari konsiderohet me rrezikshmëri të lartë shoqërore dhe është i akuzuar për një sërë veprash penale të rënda, të kryera në kuadër të një grupi të strukturuar kriminal, përfshirë:
• Vrasje me paramendim, në formën e bashkëpunimit kriminal;
• Prodhim dhe mbajtje pa leje të armëve luftarake dhe municioneve;
• Pjesëmarrje në grup të strukturuar kriminal;
• Kryerje veprash penale nga organizata kriminale;
• Sigurim kushtesh dhe mjeteve materiale për kryerje vrasjesh.

Gjykata e Posaçme e Shkallës së Parë për Korrupsionin dhe Krimin e Organizuar në Tiranë ka caktuar ndaj tij masën e sigurisë “Arrest në burg”.

Policia informon se detajet për orën e mbërritjes së shtetasit D. B. në Shqipëri do të bëhen publike me një njoftim të dytë.

Ky është një tjetër zhvillim i rëndësishëm në kuadër të përpjekjeve për të goditur krimin e organizuar dhe për të sjellë para drejtësisë personat e shpallur në kërkim ndërkombëtar.