Aktivistja e njohur suedeze Greta Thunberg do të jetë nesër në Tiranë për të marrë pjesë në një protestë të madhe që do të mbahet në Sheshin Skënderbej, më 23 korrik, ora 18:00, në mbështetje të popullit palestinez dhe për të kërkuar drejtësi për Gazën.

Protesta vjen në një kohë kur situata humanitare në Gaza ka arritur fazën e pestë të kequshqyerjes, sipas organizatave ndërkombëtare, dhe shënon një përpjekje të përbashkët mes qytetarëve, organizatave vendase dhe ndërkombëtare për të ngritur zërin kundër asaj që cilësohet si një pushtim i paligjshëm, rrethim, aparteid dhe gjenocid ndaj popullit palestinez.

Thirrja është pjesë e një vale protestash globale dhe synon të ushtrojë presion mbi komunitetin ndërkombëtar që të ndërhyjë urgjentisht për të ndalur tragjedinë njerëzore në Gaza dhe të mbajë qëndrim të qartë në mbështetje të të drejtave të njeriut dhe drejtësisë ndërkombëtare.

Organizatorët bëjnë apel për pjesëmarrje masive, duke theksuar se kjo nuk është thjesht një protestë, por një thirrje morale për të zgjedhur anën e duhur të historisë.