Një shpërthim i fuqishëm me tritol ka ndodhur në orët e para të mëngjesit të së enjtes në Tiranë, duke vënë në alarm banorët e zonës. Objektivi i sulmit ka qenë garazhi në pronësi të Elvis Kosovës, 39 vjeç, një emër i njohur për autoritetet ligjzbatuese.

Sipas burimeve zyrtare, lënda plasëse dyshohet se është vendosur në portën hyrëse të garazhit, duke shkaktuar dëme të konsiderueshme materiale, kryesisht në disa automjete të parkuara në afërsi. Fatmirësisht, nga shpërthimi nuk raportohet për të lënduar.

Elvis Kosova, i njohur në qarqet e makinave luksoze dhe garave ilegale si “Visi i garave” apo “Visi i makinave të shpejta”, nuk është i panjohur për policinë. Në gusht të vitit 2024 ai u arrestua për përvetësimin e një automjeti të markës Audi R8, me vlerë rreth 200 mijë euro, në bashkëpunim me një shtetas turk.

Sipas hetimeve të atëhershme, automjeti ishte marrë me qira në Gjermani nga shtetasi turk, dhe pas hyrjes në Shqipëri i ishte dorëzuar Elvis Kosovës. Ky i fundit dyshohet se e ka mbajtur makinën për vete, duke manipuluar dokumentacionin dhe pretenduar se automjeti i ishte “lënë” nga pronari. Shtetasi turk ka bërë kallëzim në polici duke pretenduar se automjeti i ishte vjedhur pranë një hoteli afër stadiumit “Air Albania”.

Ndërkohë, hetimet për shpërthimin e sotëm janë në vijim. Policia po punon për identifikimin e autorëve dhe për zbardhjen e motivit të vendosjes së tritolit, që dyshohet të jetë i lidhur me të kaluarën kriminale të Kosovës.