Saranda ndodhet në një situatë tensioni dhe pasigurie, pas disa ngjarjeve kriminale të rënda të ndodhura në ditët e fundit. Në përgjigje të kësaj situate, strukturat policore janë vendosur në gjendje gatishmërie të lartë, ndërsa forcat speciale RENEA dhe efektivë të operacionales së Vlorës kanë zbarkuar në qytetin bregdetar.

Paraditen e së dielës, RENEA ka kryer kontrolle të imtësishme në zonat periferike të braktisura të Sarandës, në kuadër të një operacioni për kapjen e pesë personave në kërkim, të dyshuar për përfshirje në dy ngjarje me përdorim arme zjarri dhe një tjetër me shpërthim eksplozivi. Një nga këta persona rezulton ende i paidentifikuar.

Ndërkohë, mbrëmjen e kaluar, në disa nga akset më të frekuentuara turistike të Sarandës dhe Ksamilit, dy automjete civile me efektivë të operacionales kanë ndaluar mjete të ndryshme në lëvizje, si pjesë e kontrolleve të befasishme për armëmbajtje pa leje dhe verifikim të personave me precedent penal.

Burime pranë Policisë bëjnë të ditur se Komisariati i Sarandës po përpiqet të përballojë situatën me burime të kufizuara, ndërkohë që hetimet për ngjarjet më të rënda janë marrë në dorë nga Drejtoria e Policisë së Vlorës, për shkak të mungesës së kapaciteteve të nevojshme në strukturën vendore.

Ndryshimet në organizimin e Komisariatit, i cili aktualisht mbulon të paktën 4 bashki të jugut, kanë sjellë një mbingarkesë të dukshme operacionale, duke lënë në hije menaxhimin e trafikut urban, plazheve dhe konflikteve të vogla në qytet — që, siç paralajmërojnë burime nga terreni, mund të përshkallëzohen në ngjarje të rënda kriminale.

Për momentin, prania e shtuar e forcave speciale ka rikthyer një farë ndjenje sigurie për banorët dhe turistët, por autoritetet pranojnë se stabiliteti afatgjatë kërkon përforcim të burimeve njerëzore dhe riorganizim të strukturave vendore të rendit.