Tërmeti me magnitudë 8.8 që goditi gadishullin Kamçatka në Lindjen e Largët të Rusisë ka vënë në alarm disa vende përgjatë Oqeanit Paqësor, ku përfshihet edhe Hawaii.

Në Maui, ikonë e televizionit amerikan Oprah Winfrey ka hapur rrugën e saj private për të ndihmuar në evakuimin e banorëve. Zëdhënësi i saj konfirmoi për CNN se vendimi u mor në bashkëpunim me autoritetet lokale dhe agjencinë federale të emergjencave (FEMA), ndërsa policia po menaxhon qarkullimin duke lejuar 50 automjete njëherësh të kalojnë.

Në qytetin Kahului është regjistruar një valë cunami me lartësi mbi 1.5 metra, duke detyruar mbylljen e përkohshme të porteve. Megjithëse rreziku kryesor është zbutur, autoritetet paralajmërojnë për rryma të forta dhe përmbytje të mundshme në zonat bregdetare gjatë orëve në vijim.