31 korriku është afati përfundimtar për lirimin vullnetar të hapësirave publike pranë akseve kombëtare, të zëna ilegalisht nga subjekte dhe biznese që, sipas autoriteteve, përbëjnë rrezik për sigurinë rrugore dhe shkelje të ligjit.

Zëvendëskryeministrja Belinda Balluku, njëherësh ministre e Infrastrukturës dhe Energjisë, së bashku me drejtoreshën e IKMT-së, Dallëndyshe Bici, inspektuan ditën e sotme aksin rrugor Kamzë–Laç, ku theksuan se pas kësaj date do të nisë penalizimi i të gjithë atyre që refuzojnë të zhvendosen.

“Po zbatohet reforma e kthimit të ligjshmërisë në territor për sa i përket sigurisë rrugore dhe lirimit të hapësirave publike, që janë zënë në mënyrë të paligjshme, sidomos nga të ashtuquajturat varreza të automjeteve”, u shpreh Balluku.

Sipas saj, akti normativ i vitit 2011 përcakton qartë se varrezat e automjeteve duhet të jenë të paktën 1 kilometër larg rrugëve kombëtare. Ajo theksoi se aksioni ka nisur tashmë në rrugën e Ndroqit, ku disa kompani janë tërhequr vullnetarisht nga hapësirat e zëna.

“U bëjmë edhe një herë thirrje të gjithë subjekteve që të lirojnë hapësirat me vullnet të lirë deri më 31 korrik, përndryshe do të përballen me ndërhyrjen e IKMT-së dhe penalizime të plota”, paralajmëroi ministrja.

Balluku nënvizoi se ky operacion është pjesë e reformës kombëtare për çlirimin e territorit dhe përmirësimin e sigurisë rrugore në të gjithë vendin.