Gadishulli Iberik po përballet me ditë dramatike për shkak të temperaturave përvëluese dhe zjarreve që kanë përfshirë Portugali dhe Spanjën. Termometrat kanë shënuar deri në 40 gradë Celsius, ndërsa autoritetet vijojnë betejën me flakët në disa rajone.

Në Portugali, mbi 3 mijë zjarrfikës, 1 mijë automjete dhe 26 helikopterë e dronë janë angazhuar në terren për të përballuar situatën. Zjarri më i madh, në veri të vendit pranë kufirit me Spanjën, po kërcënon fshatra dhe zonën e mbrojtur natyrore të Geres. Në qendër të vendit një tjetër vatër shpërtheu me shpejtësi për shkak të erërave të forta.

Ndërsa flakët shkrumbojnë pyje, kryeqyteti Lisbonë u përball sot me temperatura që iu afruan 40 gradëve, duke detyruar banorët të kërkojnë freski në plazhe e pishina. Por edhe aty, shqetësimi për klimën e tejngrohur ishte i pranishëm.

Situata është e ngjashme edhe në Spanjë, ku zjarrfikësit po luftojnë disa vatra, veçanërisht në rajonin e Avilës, vetëm një orë nga Madridi.

Edhe pse viti 2025 ka regjistruar më shumë zjarre sesa vitet e fundit, autoritetet theksojnë se deri më tani sipërfaqja e djegur është dukshëm më e vogël.