Prizreni është tronditur nga një akt vandalizmi ndaj shtatores së Heroit Kombëtar, Gjergj Kastrioti Skënderbeut. Përkrenarja dhe shpata e monumentit, i vendosur në rrethrrotullimin e rrugës “Hasan Prishtina”, janë lyer me ngjyrë ari nga autorë ende të paidentifikuar.

Shoqata “Trojet e Arbrit” e ka dënuar ashpër këtë veprim, duke e cilësuar si një sulm të qëllimshëm ndaj figurës më të madhe të historisë kombëtare.

“Kjo është një shëmti e papranueshme, një provokim që prek jo vetëm figurën e Skënderbeut, por edhe krenarinë tonë kombëtare,” – shkruan kryetari i shoqatës, Nue Oroshi, në një reagim publik. Ai u ka bërë thirrje institucioneve të rendit dhe drejtësisë të zbardhin sa më shpejt autorët dhe t’i nxjerrin para përgjegjësisë.

Shtatorja e Skënderbeut në Prizren u inaugurua më 28 nëntor 2020 dhe ka një simbolikë të veçantë për qytetin që mbart trashëgiminë historike të Lidhjes Shqiptare të Prizrenit.