Fushata e ashpër e Kinës kundër korrupsionit në futboll vijon me dënime të reja të bujshme. Pas ish-trajnerit të kombëtares Li Tie, i cili pak muaj më parë mori 20 vite burg, këtë herë gjykatat kineze kanë dënuar dy funksionarë të lartë të futbollit vendas.

Liu Jun, ish-president i Superligës kineze dhe figurë e njohur edhe në Europë si ish-administrator i deleguar i Interit në vitin 2016, është dënuar me 11 vite burg dhe gjobë prej 132 mijë eurosh. Për vite me radhë ai ka qenë një nga drejtuesit kryesorë të grupit Suning, përfshirë edhe klubin Jiangsu Suning që më pas u shpërbë.

Në të njëjtin proces është dënuar edhe Uang Xiaoping, ish-kreu i komisionit disiplinor të Federatës Kineze të Futbollit, i cili do të vuajë 10 vite burg dhe një gjobë prej 84 mijë eurosh.

Të dy janë shpallur fajtorë për marrje ryshfetesh, megjithëse autoritetet kineze nuk kanë bërë publike detaje për çështjet konkrete që i implikojnë.

Kjo është një tjetër lëvizje e fuqishme e qeverisë kineze në përpjekjen për të pastruar futbollin e vendit nga trukimet dhe korrupsioni që prej disa vitesh ka ndikuar në imazhin e kampionatit vendas.