Një operacion i koduar “Fraud” është finalizuar nga specialistët e Seksionit për Hetimin e Krimeve Ekonomike dhe Financiare në kryeqytet, pas një kallëzimi për mashtrim financiar.

Në pranga ka rënë shtetasi E. D., 33 vjeç, i cili akuzohet se, në periudha të ndryshme kohore, i ka marrë 10 mijë euro një qytetari me premtimin se do të shlyente detyrimet tatimore të aktivitetit të tij tregtar.

Nga hetimet e kryera ka rezultuar se paratë nuk janë përdorur për qëllimin e deklaruar, ndërsa materialet e çështjes i kanë kaluar Prokurorisë për veprime të mëtejshme ligjore, nën akuzën e “Mashtrimit”.

Policia apelon që qytetarët të denoncojnë raste të tilla dhe paralajmëron se do të vijojë aksionet kundër mashtrimeve ekonomike.