Fundjava e parë e gushtit ka sjellë rritje të ndjeshme të lëvizjes në pikat kufitare të Kakavijes dhe Qafë-Thanës, ku mijëra emigrantë dhe turistë hyjnë në territorin shqiptar për pushime verore.

Sipas të dhënave të Policisë Kufitare, në pikën e Kakavijes vetëm gjatë 24 orëve të fundit kanë hyrë në Shqipëri rreth 6 mijë persona dhe 1 700 automjete, ndërsa 3 500 persona dhe 1 300 automjete kanë udhëtuar drejt Greqisë. Shumica e udhëtarëve janë emigrantë që kthehen në atdhe për të kaluar pushimet, por edhe turistë grekë që vizitojnë bregdetin shqiptar.

Për të përballuar fluksin, janë hapur 4 sportele për udhëtarët dhe një sportel i dedikuar për kamionët, por pavarësisht kësaj nuk kanë munguar radhët dhe vonesat.

Ndërkohë, fluks i lartë udhëtarësh është shënuar edhe në pikën kufitare të Qafë-Thanës, ku dhjetëra automjete nga Maqedonia e Veriut presin në radhë për të hyrë në territorin shqiptar.
Shumica e tyre udhëtojnë drejt qyteteve bregdetare për të kaluar pushimet verore.