TIRANË – Policia e Tiranës ka arritur të zbardhë ngjarjen e ndodhur më 24 korrik 2025, në rrugën “Peti”, ku në portën e garazhit të shtetasit Elvis Kosova, i njohur ndryshe si “Visi i Garave”, u vendos një sasi lënde plasëse.

Pas hetimeve të thelluara nga shërbimet e Komisariatit të Policisë Nr. 1, është bërë e mundur identifikimi i autorit të dyshuar, shtetasit Klodian Steli, 36 vjeç, banues në Fushë-Krujë, i cili tashmë është shpallur në kërkim.

Sipas njoftimit zyrtar, gjatë hetimeve është gjetur edhe automjeti që Steli dyshohet se ka përdorur në momentin e kryerjes së krimit, ndërsa strukturat policore po punojnë intensivisht për lokalizimin dhe arrestimin e tij.

Ngjarja ka shkaktuar shqetësim në zonë, ndërsa autoritetet nuk raportojnë për persona të lënduar, por dëme materiale të konsiderueshme në hyrjen e garazhit të subjektit në fjalë.

Materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm në Tiranë, për veprime të mëtejshme hetimore. Policia nuk ka dhënë ende detaje mbi motivin e sulmit, ndërsa burime nga grupi hetimor bëjnë me dije se po shqyrtohen të gjitha pistat e mundshme, përfshirë ato të konfliktit personal apo prapavijës kriminale.