Serbia ka vazhduar me valën e arrestimeve të qytetarëve nga Kosova në pikat kufitare, duke i mbështetur veprimet e saj me akuza për pjesëmarrje në Ushtrinë Çlirimtare të Kosovës (UÇK). Rasti më i fundit është ai i Behar Preniqit, i cili është ndaluar në pikën kufitare Bajakovo, mes Kroacisë dhe Serbisë.

Sipas burimeve të IndeksOnline, Preniqi ishte në rrugë nga Gjermania drejt Kosovës kur është ndaluar nga autoritetet serbe. Ai po akuzohet për të ashtuquajturat “krime lufte”, me pretendimin se ka qenë pjesëtar i UÇK-së – ndonëse gjatë kohës së luftës ai ishte vetëm 16 vjeç.

Ky është vetëm një nga një sërë rastesh të ngjashme që kanë ndodhur muajt e fundit, ku shtetas të Kosovës janë arrestuar në territorin serb nën akuza që mbeten të paprovuara dhe që kanë ngjallur shqetësim të madh në opinionin publik dhe institucionet kosovare.

Autoritetet në Prishtinë nuk kanë reaguar ende zyrtarisht për arrestimin e Preniqit, por organizatat për të drejtat e njeriut dhe avokatët mbrojtës kanë paralajmëruar se këto veprime përbëjnë shkelje të të drejtave themelore të njeriut dhe përdorim politik të drejtësisë.

Ndërkohë, familjarët dhe të afërmit e Preniqit janë në pritje të informacioneve zyrtare mbi gjendjen e tij dhe vendndodhjen, ndërsa shqetësimet për sigurinë e qytetarëve të Kosovës që udhëtojnë përmes Serbisë janë në rritje.