Një aksident rrugor është regjistruar pasditen e sotme në unazën e madhe të qytetit të Vlorës, konkretisht në zonën e njohur si Centrali.

Sipas burimeve nga vendngjarja, një motor është përplasur nga një automjet tip fuoristradë, me targa italiane, i cili drejtohej nga një shtetas i huaj. Si pasojë e përplasjes, ka mbetur i plagosur drejtuesi i motorit, i cili është transportuar me urgjencë në spital.

Fatmirësisht, burime mjekësore konfirmojnë se i plagosuri është jashtë rrezikut për jetën.

Ndërkohë, aksidenti ka shkaktuar pengesa serioze në qarkullimin rrugor përgjatë gjithë aksit, duke sjellë trafik të rënduar për një periudhë të gjatë kohe.

Policia ndodhet në vendngjarje dhe ka nisur hetimet për zbardhjen e plotë të rrethanave të aksidentit. Mbetet ende për t’u sqaruar nëse përplasja ka ardhur për shkak të shpejtësisë, mungesës së vëmendjes apo parakalimit të gabuar.