Një seri mesazhesh të fshehta në Telegram ka rikthyer në qendër të vëmendjes Louisa Rozovën, 22-vjeçaren që dyshohet të jetë vajza sekrete e presidentit rus Vladimir Putin. E njohur në fushën e artit me emrin Elizaveta Krivonogik, ajo u shfaq për herë të parë në publik me një qëndrim të qartë kundër luftës në Ukrainë dhe me kritika indirekte ndaj kreut të Kremlinit.

Në një postim të fundit në llogarinë e saj në Telegram, Rozova shkroi: “Burri që mori miliona jetë dhe shkatërroi timen.” Megjithëse nuk përmendi emrin e Putinit, mesazhi u interpretua gjerësisht si një akuzë ndaj tij, për shkak të lidhjeve të saj familjare që janë përfolur prej kohësh.

Louisa, e lindur në Shën Petersburg në vitin 2003 dhe e diplomuar në menaxhim kulturor në Paris, punon aktualisht në dy galeri arti që promovojnë ekspozita kundër luftës. Megjithatë, prezenca e saj ka shkaktuar debate, përfshirë edhe ndërprerjen e bashkëpunimit nga disa artistë të tjerë që e shohin si problematike përfaqësimin nga një person i lidhur me regjimin.

Në përgjigje të kritikave, Rozova pyeti hapur: “A jam unë vërtet përgjegjëse për veprimet e një familjeje që as nuk mund të më dëgjojë?”

Ndërkohë, ajo po përdor edhe emrin Elizaveta Rudova, duke u përpjekur të krijojë një distancë nga e kaluara dhe lidhjet me Putinin, ndërsa angazhimi i saj politik dhe artistik mbetet në qendër të vëmendjes ndërkombëtare.