Britania u godit sot nga stuhia e fuqishme Floris, me erëra që arritën shpejtësi deri në 170 kilometra në orë në zonat malore dhe deri në 144 km/orë në qytete, duke shkaktuar ndërprerje të energjisë elektrike, dëme në infrastrukturë dhe anulime masive në pjesë të ndryshme të Mbretërisë së Bashkuar.

Skocia qendrore dhe veriore u përballën me goditjet më të rënda, ku autoritetet vendosën paralajmërimin portokalli dhe ndaluan udhëtimet deri në mbrëmje. Paralajmërime të tjera u lëshuan për Irlandën e Veriut, pjesë të Uellsit dhe Anglisë veriore, ku meteorologët paralajmëruan për “erëra jashtëzakonisht të forta dhe potencialisht shkatërruese.”

Shërbimi Meteorologjik Britanik njoftoi se dëmet në linjat hekurudhore ishin të shumta, duke detyruar kompaninë ScotRail të ulë shpejtësinë në disa trena dhe të paralajmërojë banorët për sigurinë e mobiljeve të jashtme. Në Skoci, pemët e rrëzuara kanë dëmtuar infrastrukturën hekurudhore, ndërsa disa ura janë mbyllur për disa kategori automjetesh për shkak të rrezikut nga stuhia.

Shoferët u nxitën për kujdes maksimal pasi autostrada A87 u përball me karvanë të përmbysur, ndërsa ngjarje të rëndësishme si Royal Edinburgh Military Tattoo u anuluan për herë të parë në 75 vjet për shkak të motit ekstrem.

Meteorologu i Met Office, Peter Sloss, e përshkroi stuhinë si “territor të paeksploruar,” duke theksuar fuqinë e jashtëzakonshme të Fenomenit Floris, i cili mbetet stuhia më e fuqishme që ka goditur Britaninë gjatë këtij muaji gusht.