Një tërmet i fuqishëm me magnitudë 8.8 ballë që goditi pranë Gadishullit Kamchatka në Lindjen e Largët të Rusisë, ka shkaktuar një seri shpërthimesh vullkanike të paprecedentë në rajon, duke e kthyer zonën në një pikë kritike të aktivitetit gjeologjik.

Sipas Institutit të Vullkanologjisë dhe Sizmologjisë të Rusisë, tërmeti jo vetëm që zhvendosi gadishullin me gati dy metra në drejtim të jugut, por edhe aktivizoi shtatë vullkane, disa prej të cilëve kishin qenë të heshtur për qindra vjet.

Vullkani Krasheninnikov, për shembull, ka derdhur lavë për herë të parë që nga viti 1463, duke regjistruar një shpërthim të fuqishëm të dielën e kaluar. Pamje të rralla tregojnë rrjedhën e lavës që zbret përgjatë pjerrësisë, ndërsa re të dendura hiri ngrihen mbi horizont.

Ekspertët e lidhin drejtpërdrejt këtë “zgjim vullkanik” me energjinë e çliruar nga tërmeti.

“Ne ia atribuojmë shpërthimet tërmetit, i cili aktivizoi vatrat magmatike dhe u dha atyre energji shtesë,” – u shpreh Alexey Ozerov, drejtor i Institutit dhe anëtar i Akademisë Ruse të Shkencave, për agjencinë TASS.

Zona e Kamchatkës, e njohur për zinxhirin e saj të dendur vullkanesh, ndodhet në një nga pikat më aktive sizmike të globit – ku pllaka tektonike e Paqësorit përplaset me atë Euroaziatike – dhe shpesh regjistron lëvizje të mëdha. Por, aktivizimi i njëkohshëm i kaq shumë vullkaneve është i rrallë dhe shqetësues për banorët dhe komunitetin shkencor ndërkombëtar.

Autoritetet lokale janë vënë në gatishmëri, ndërsa ekspertët paralajmërojnë për mundësi shpërthimesh të tjera në ditët apo javët në vijim. Evakuime masive nuk janë urdhëruar ende, por monitorimi i vazhdueshëm po bëhet përmes satelitëve dhe stacioneve të terrenit.