Në një veprim të fortë kundër mashtrimeve digjitale, Meta ka njoftuar se WhatsApp ka mbyllur 6.8 milionë llogari në gjysmën e parë të vitit 2025, të lidhura me rrjete ndërkombëtare mashtrimi, kryesisht në Azinë Juglindore.

“Zbulimi dhe mbyllja e këtyre llogarive u bë proaktivisht, përpara se ato të viheshin në funksionim nga qendrat kriminale të mashtrimit,” – thuhet në deklaratën zyrtare të Meta-s.

Këto llogari ishin pjesë e qendrave mashtruese të drejtuara nga grupe të organizuara kriminale, të cilat shpesh përdorin punë të detyruar për të manipuluar përdoruesit dhe për të zhvilluar skema të sofistikuara investimi apo promovimi të rremë.

Skemat: Nga mesazhe mashtruese tek skema piramidale me skuterë

Mashtruesit përdorin taktika gjithnjë e më të sofistikuara, siç është shtimi i viktimave në grupe WhatsApp nga numra të panjohur, për të promovuar skema investimi të rreme ose për të vjedhur informacione personale.

Në një rast të veçantë, WhatsApp bashkëpunoi me Meta dhe OpenAI, për të goditur një rrjet kriminal nga Kamboxhia, i cili përdorte ChatGPT për të hartuar udhëzime bindëse dhe për të rekrutuar viktima në një mashtrim që përfshinte marrjen me qira të skuterëve fiktivë dhe shpërblime në para për pëlqime në rrjete sociale.

Masa të reja mbrojtjeje për përdoruesit

Në vijim të këtyre zhvillimeve, WhatsApp ka njoftuar masa të reja kundër mashtrimit, përfshirë:
• Njoftime kur një përdorues shtohet në një grup nga një kontakt i panjohur
• Zbulim më i hershëm dhe bllokim automatik i llogarive mashtruese
• Monitorim aktiv të modeleve të dyshimta komunikimi

Meta u ka bërë thirrje përdoruesve që të mos bashkëpunojnë me mesazhe të dyshimta, të verifikojnë kontaktet para ndërveprimit, dhe të raportojnë menjëherë çdo sjellje të pazakontë në aplikacion.

Ky operacion i gjerë konfirmon sfidat në rritje që platformat digjitale përballen përballë rrezikut global të mashtrimeve në internet, dhe përpjekjet në rritje për të mbrojtur sigurinë e përdoruesve.