Prishtinë, 5 gusht 2025 – Presidentja e Republikës së Kosovës, Vjosa Osmani, ka pritur sot në takim Përfaqësuesin e Posaçëm të Bashkimit Evropian për Dialogun Kosovë-Serbi, Peter Sorensen, me të cilin ka diskutuar për procesin e integrimit evropian, masat ndëshkuese të BE-së dhe situatën e sigurisë në rajon.

Në një deklaratë të Presidencës, thuhet se presidentja Osmani ka kërkuar heqjen e menjëhershme të masave të padrejta ndaj Kosovës, duke theksuar se ato po godasin qytetarët dhe po pengojnë përparimin drejt Bashkimit Evropian.

“Kosova meriton drejtësi evropiane, jo masa të padrejta,” u shpreh Osmani gjatë takimit.

Presidentja ka nënvizuar gjithashtu rëndësinë e funksionimit demokratik të institucioneve, përfshirë konstituimin e Kuvendit dhe strukturave të tjera qeverisëse, si një hap i domosdoshëm për të çuar përpara objektivat e përbashkëta me BE-në.

Në fokus të bisedës ishte edhe çështja e arrestimeve arbitrare të qytetarëve të Kosovës nga autoritetet serbe. Osmani i kërkoi përfaqësuesit evropian që BE-ja të reagojë me vendosmëri ndaj këtyre shkeljeve të të drejtave të njeriut, duke i cilësuar si të papranueshme dhe të paligjshme.

Takimi u zhvillua në një kohë vendimtare për dialogun Kosovë-Serbi dhe sfidat që po kalon rajoni, teksa Prishtina kërkon një rol më të angazhuar të Bashkimit Evropian në mbrojtje të parimeve të drejtësisë dhe barazisë.