Manchester, 5 gusht 2025 – Benjamin Sesko, sulmuesi 22-vjeçar i RB Leipzig, është shumë pranë një transferimi te Manchester United, pasi ka rënë dakord plotësisht për kushtet personale me klubin anglez.

Lajmi është konfirmuar nga gazetari i njohur i merkatos, Fabrizio Romano, i cili raporton se Sesko ka pranuar një kontratë që do të zgjasë deri në qershor të vitit 2030, duke treguar një angazhim afatgjatë me “Djajtë e Kuq”.

“Benjamin Sesko e sheh të ardhmen e tij në Old Trafford,” shkruan Romano, duke shtuar se sulmuesi nuk ka marrë seriozisht asnjë ofertë tjetër, pavarësisht interesimit të madh nga klube të njohura europiane.

Në këtë fazë, Manchester United dhe RB Leipzig janë duke zhvilluar bisedimet finale për transferimin, ndërsa optimizmi është në rritje për një marrëveshje të plotë mes klubeve.

Për United, Sesko shihet si zgjidhje strategjike për të përforcuar repartin e sulmit, një zonë ku klubi ka vuajtur prej disa sezonesh.

Transferimi i mundshëm i sulmuesit slloven pritet të jetë një nga lëvizjet më të rëndësishme të merkatos së kësaj vere për “Djajtë e Kuq”, të cilët kërkojnë të ndërtojnë një skuadër të re konkurruese në Premier League dhe arenën europiane.