Një aksident detar është regjistruar mesditën e së martës pranë ishullit Diaporos, në zonën turistike të njohur të Halkidikit, në Greqi. Një skaf me shtatë persona në bord, gjashtë prej tyre shtetas nga Kosova dhe një shtetas amerikan, është përplasur në një breg shkëmbor, duke shkaktuar momente paniku për pushuesit.

Sipas autoriteteve portuale greke, tre persona mbetën të plagosur si pasojë e përplasjes. Të lënduarit u dërguan fillimisht në Qendrën Shëndetësore të Agios Nikolaos për ndihmën e parë, dhe më pas u transferuan në Spitalin e Përgjithshëm të Poligyros. Fatmirësisht, të tre janë jashtë rrezikut për jetën dhe tashmë janë lënë të lirë nga spitali.

Skafi, i cili ishte marrë me qira për qëllime turistike, është përmbysur pas përplasjes dhe më vonë është tërhequr në breg nga ekipet e shpëtimit.

Hetime për shkaqet e aksidentit

Autoritetet portuale të Ormos Panagias kanë nisur një hetim për të përcaktuar shkaqet e aksidentit dhe nëse janë respektuar të gjitha protokollet e sigurisë detare. Deri më tani, nuk raportohen ndotje të mjedisit detar, ndërsa mbetet e paqartë nëse drejtuesi i skafit posedonte të gjitha lejet e nevojshme.

Zona e Halkidikit dhe sidomos ishulli Diaporos janë ndër destinacionet më të frekuentuara nga pushuesit shqiptarë dhe kosovarë gjatë sezonit veror. Ky incident vjen në një kohë kur trafiku detar i mjeteve të vogla lundruese është maksimal, duke shtuar nevojën për rritjen e kontrollit dhe kujdesit në det.