Avokatura e Shtetit ka reaguar zyrtarisht pas ndërhyrjes së policisë në ambientet ku operon televizioni News 24, duke sqaruar arsyet ligjore që qëndrojnë pas këtij veprimi.
Sipas njoftimit, objekti në pronësi shtetërore në zonën e Shkozës është mbajtur pa titull ligjor nga subjekti “Fokus Media News” prej më shumë se tre vitesh, pas përfundimit të kontratës së qirasë në maj 2022.
Megjithë njoftimet dhe kërkesat për dorëzim vullnetar, televizioni nuk ka liruar ambientet, por ka nisur procese gjyqësore për të penguar ekzekutimin. Çështja ka kaluar të gjitha shkallët e gjyqësorit dhe më 14 korrik 2025, Gjykata e Apelit Administrativ vendosi lirimin e menjëhershëm të pronës.
Ambienti iu kalua shoqërisë shtetërore “KAYO”, e cila do të realizojë projektin strategjik për bashkëprodhimin e mjeteve motorike, me synim rivitalizimin e industrisë ushtarake dhe krijimin e vendeve të reja pune.
Avokatura thekson se procedurat për marrjen në posedim faktik të pronës janë në vazhdim dhe se vendimi i gjykatës është i detyrueshëm dhe duhet të ekzekutohet pa vonesë, si një domosdoshmëri për respektimin e rendit kushtetues dhe interesit të qytetarëve.
