Një mëngjes i pazakontë dhe i rëndë ka goditur redaksinë e News24. Rreth orës 06:00, dera e televizionit është mbyllur me dry nga autoritetet, duke ndërprerë transmetimin dhe duke shkaktuar reagime të forta nga stafi.

“Pashë derën e televizionit ku punoj të mbyllur me dry, nga forca e pushtetit,” tregoi një prej gazetarëve, i cili bashkë me kolegët u përpoq të hynte në godinën e redaksisë.

Sipas tyre, ndërhyrja ndodhi në godinën e re të televizionit, e cila, siç konfirmon Ministria e Ekonomisë, “nuk është nën administrimin e kompanisë ‘Kajo’, por i përket ‘Panorama Group’, me kontratë qiraje deri në vitin 2033.”

Për të treguar se ndërprerja nuk ishte për fajin e tyre, gazetarët u futën “live” në YouTube. Momenti më i ndjeshëm ndodhi kur drejtoresha Anila Jole shpërtheu në lot.

“Nuk ishin lot për muret e një godine, por për lirinë e fjalës dhe shprehjes, për mundin e shumë viteve pune të ndershme,” tha një gazetar, duke theksuar se stafi e konsideron televizionin si familje.

Ndërhyrja, sipas dëshmive, u krye fillimisht nga policia dhe më pas nga ushtria me policinë ushtarake. Shumë prej punonjësve qëndruan me orë para portës së mbyllur.

“Një familjeje mund t’i heqësh strehën, por nuk mund t’i ndash zemrën, dashurinë, besimin dhe përkushtimin. News24 do të mbetet gjithmonë një familje e fortë edhe pa mure e çati,” u shpreh një prej gazetarëve të pranishëm.

Ngjarja ka ngjallur reagime të shumta në opinionin publik, ndërsa pritet që autoritetet dhe drejtuesit e medias të japin sqarime të mëtejshme.