Një studim i ri ka zbuluar se tipi beta i virusit human papilloma (HPV) mund të integrohet në ADN-në e qelizave të njeriut, duke nxitur zhvillimin e kancerit – një rrezik i veçantë për personat me sistem imunitar të dobësuar.

Prej kohësh besohej se beta-HPV vetëm përkeqësonte dëmtimet e lëkurës të shkaktuara nga rrezatimi UV. Por studiuesit kanë dokumentuar për herë të parë një rast ku virusi mori kontrollin e qelizave dhe nxitjen e kancerit.

Një rast i rrallë që ndryshoi kuptimin e sëmundjes
Rasti i një gruaje 34-vjeçare me karcinomë të qelizave skuamoze (cSCC) tronditi mjekët. Pavarësisht operacioneve dhe imunoterapisë, tumoret i riktheheshin vazhdimisht.

Analizat gjenetike treguan një fakt befasues: beta-HPV ishte integruar në ADN-në e qelizave të kancerit, duke prodhuar proteina që përshpejtonin përparimin e sëmundjes. “Ky është rasti i parë i konfirmuar ku beta-HPV ka luajtur rol aktiv në ruajtjen e kancerit,” raportoi Science Alert.

Imuniteti i dobët, pika e dobët e trupit
Pacientja kishte një çrregullim të rrallë të lindur që pengonte qelizat T – mbrojtësit kryesorë kundër infeksioneve – të luftonin HPV-në. Edhe pse trupi i saj riparonte dëmtimet nga dielli, imuniteti i dobët i hapi rrugën virusit.

“Kjo tregon se mund të ketë pacientë të tjerë me cSCC agresive që kanë defekte imunitare dhe mund të përfitojnë nga terapi të fokusuara tek sistemi imunitar,” shpjegoi imunologia Andrea Lisco nga NIAID.

Trajtimi që solli shërimin e plotë
Pas zbulimit të shkakut, mjekët realizuan një transplant të qelizave staminale të palcës kockore. Ky trajtim jo vetëm eliminoi kancerin agresiv, por zhduku edhe të gjitha simptomat e HPV-së.

“Ky sukses nuk do të ishte i mundur pa bashkëpunimin e virusologëve, imunologëve, onkologëve dhe ekspertëve të transplantit,” theksoi Lisco.

Një hap i madh për të ardhmen
Megjithëse rrezatimi UV mbetet shkaktari kryesor i kancerit të lëkurës, ky zbulim tregon se viruse si beta-HPV mund të kenë një rol të drejtpërdrejtë në raste të caktuara. Ai hap rrugën për qasje të personalizuara në trajtimin e kancerit, duke ofruar shpresë edhe për luftën kundër formave të tjera të HPV-së, përfshirë ato që shkaktojnë kancerin e qafës së mitrës.

“Kjo mund të ndryshojë tërësisht mënyrën si e trajtojmë cSCC-në tek pacientët me imunitet të dëmtuar,” përfundoi Lisco.