Një 23-vjeçar shqiptar, që kishte hyrë në Zvicër si turist, ka përfunduar pas hekurave pasi u kap në trafik kokaine. Sipas policisë zvicerane, i riu ishte pjesë e një rrjeti shpërndarësish droge, duke furnizuar klientë vendas në zonën e Bellinzonës.

Arrestimi u krye të hënën, pas një operacioni të befasishëm të policisë dhe prokurorisë publike. “Gjatë kontrollit në banesën e të dyshuarit u sekuestruan dhjetëra doza kokaine, 1 mijë franga zvicerane, qindra euro cash dhe prova të tjera të aktivitetit kriminal,” thuhet në njoftimin zyrtar.

Autoritetet po hetojnë edhe për pastrim parash dhe shkelje të ligjit federal për të huajt, pasi dyshohet se fitimet nga droga ishin futur në qarkullim përmes kanaleve të paligjshme.

“Gjykatësi përgjegjës për masat shtrënguese ka konfirmuar arrestimin,” deklaroi policia, duke shtuar se hetimet për rrjetin e shpërndarjes vijojnë.