Bota e boksit është në zi pas ndarjes tragjike nga jeta të Shigetoshi Kotarit, një nga talentet më premtues të peshave super pendë. Boksieri japonez ndërroi jetë në moshën 28-vjeçare, vetëm gjashtë ditë pas ndeshjes dramatike për titull kundër Yamato Hatës, e cila përfundoi në barazim pas 12 raundeve.

Kotari humbi ndjenjat menjëherë pas ndeshjes së 2 gushtit në Sallën Kuroken dhe u dërgua me urgjencë në spital, ku iu nënshtrua një operacioni të menjëhershëm në tru. Pavarësisht përpjekjeve të mjekëve, ai ndërroi jetë më 8 gusht nga plagët e marra.

“U prehsh në paqe, Shigetoshi Kotari. Një luftëtar në ring, një luftëtar në shpirt. Iku shumë shpejt,” – shkroi Organizata Botërore e Boksit në një deklaratë ngushëllimi. “Mendimet dhe lutjet tona janë me familjen, ekipin dhe të gjithë komunitetin japonez të boksit.”

Tragjedia ka ndezur debate mbi sigurinë e boksit, pasi gjatë së njëjtës mbrëmje edhe kundërshtari i Kotarit, Hata, pësoi dëmtime serioze në kokë. Një tjetër boksier, Hiromasa Urakawa, që kishte luftuar më herët atë natë, mbeti në koma pas ndeshjes.

Rastet e fundit kanë shtuar shqetësimet. Në dy vitet e fundit, japonezët Kazuki Anaguchi dhe Kanamu Sakama kanë humbur jetën pas dëmtimeve të marra në ring, duke rritur presionin mbi federatat për rishikimin e protokolleve të sigurisë.