Policia e Tiranës finalizoi me sukses operacionin e koduar “Pako 6”, duke arrestuar në flagrancë dy shtetas të mitur dhe shpallur në kërkim një tjetër, të përfshirë në trafikimin e 1 kilogram e 118 gram Cannabis Sativa me përqindje të lartë të substancës THC.

Në kuadër të aksioneve të vazhdueshme për goditjen e trafikut të drogës, Seksioni për Hetimin e Narkotikëve, në bashkëpunim me Prokurorinë dhe strukturat e Komisariatit të Policisë Rinas, si dhe Filialin “Qendra Tranzite” të Postës Shqiptare, arrestoi dy 17-vjeçarë që morën në një degë postare në Vorë një pako të trafikuar nga SHBA, me qëllim shitjen në tregun vendas.

Aktualisht vijon puna për identifikimin dhe kapjen e personave të tjerë të përfshirë në këtë rrjet, si dhe dokumentimin ligjor të plotë të ngjarjes. Materialet i janë dorëzuar Prokurorisë së Tiranës për veprime të mëtejshme hetimore.