Një person është arrestuar nga Policia e Kosovës në Prizren më 11 gusht, pasi gjatë kontrolleve në dy lokacione iu sekuestrua një sasi e konsiderueshme droge, e llojit kokainë, me peshë totale prej 4 kilogramë e 440 gramë.

Sipas njoftimit zyrtar, droga e kapur në tregun ilegal mund të ketë vlerën deri në 300 mijë euro. I arrestuari, me inicialet H.K., i lindur në vitin 1994, pas intervistimit u dërgua në ndalim policor për 48 orë.

Policia gjithashtu sekuestruar peshore elektronike, pajisje për vakumimin e qeseve plastike, telefon, një motoçikletë dhe 260 euro para të gatshme, të cilat do të shërbejnë si prova materiale në hetimet që vijojnë.

Autoritetet po punojnë intensivisht për zbardhjen e plotë të këtij rasti dhe për kapjen e personave të tjerë të përfshirë në trafikun e drogës.