Kryeministri Edi Rama ka reaguar lidhur me situatën e zjarreve që kanë përfshirë vendin, duke e cilësuar ditën e sotme si një “ditë sakrifice dhe krenarie” për të gjitha strukturat shtetërore.

Sipas Ramës, gjatë 24 orëve të fundit janë regjistruar 34 vatra aktive, prej të cilave 13 janë të izoluara. Ai nënvizoi se gatishmëria ka qenë maksimale dhe bashkëpunimi mes të gjitha strukturave shtetërore, si dhe mbështetja e partnerëve europianë dhe emiratas, kanë qenë të larta për të përballuar situatën.

Në operacionet për shuarjen e flakëve janë angazhuar:
• Dhjetra mjete zjarrfikëse dhe trupa të Shërbimit të Mbrojtjes nga Zjarri dhe Shpëtimi në të gjitha bashkitë e prekura.
• Mbi 600 efektivë të Forcave të Armatosura, zjarrfikës, punonjës bashkiakë dhe forca vullnetare.
• 5 helikopterë dhe 1 avion zjarrfikës Canadair, i sjellë nga Italia.
• Qindra mjete, përfshirë autoambulanca dhe mjete transporti për evakuimin dhe mbështetjen e banorëve.

Vatrat që kërkojnë vëmendje të veçantë vazhdojnë të jenë: Delvinë, Poliçan, Gramsh, Dropull, Finiq, Berat, Tepelenë dhe Bulqizë, ku forcat nga toka dhe ajri po punojnë pa ndërprerje për mbrojtjen e jetës së qytetarëve dhe pronës.

Kryeministri Rama theksoi se situata është e vështirë, por përpjekjet e koordinuara dhe mbështetja ndërkombëtare po ndihmojnë në kontrollin e flakëve.