Policia ka identifikuar dhe arrestuar tre shtetas për zjarrvënie të qëllimshme në zonat e Fierit dhe Lushnjës, pas veprimeve hetimore dhe operacionale për përcaktimin e autorësisë së ngjarjeve.
Në Fier, 68-vjeçari Faik Buzi, banues në lagjen “Bishanak”, u kap në flagrancë duke ndezur zjarr pranë argjinaturës së lumit Gjanica. Ai dyshohet gjithashtu se ka shkaktuar tre vatra të tjera zjarri në lagjen ku banonte. Përhapja e flakëve nga era shkaktoi djegien e një sipërfaqe të konsiderueshme toke me bimësi të egër. Buzi kishte precedent penal për zjarrvënie dhe dhunë në familje.
Në Lushnjë, janë arrestuar dy persona të tjerë:
• Gëzim Hysi, 61 vjeç, nga lagjja “18 Tetori”, dyshohet se ndezi zjarr në tokën e tij për djegien e mbeturinave, duke përfshirë ish fushën e mbetjeve urbane, ku flakët rrezikuan banesa.
• Novruz Deneku, 62 vjeç, nga fshati Delisufaj, dyshohet se ndezi zjarr pranë banesës së tij, i cili u përhap në një territor të konsiderueshëm dhe rrezikoi banesa.
Materialet procedurale janë referuar Prokurorisë pranë Gjykatës së Shkallës së Parë e Juridiksionit të Përgjithshëm Fier, për veprime të mëtejshme ligjore.
