Presidenti rus, Vladimir Putin, vetëm pak minuta pas mbërritjes së tij në Alaskë, është vënë nën presionin e pyetjeve të shumta të gazetarëve ndërkombëtarë që po ndjekin nga afër zhvillimet e samitit historik me Donald Trump.

Edhe pse presidenti amerikan kishte bërë të qartë më herët se asnjë prej liderëve nuk do t’u përgjigjej pyetjeve para takimit, gazetarët nuk hezituan të insistojnë, duke e vendosur Putinin në një situatë të sikletshme.

Pamjet e publikuara tregojnë se presidenti rus reagoi me mimika të qarta mospëlqimi, teksa pyetjet e gazetarëve bëheshin gjithnjë e më të drejtpërdrejta dhe sfiduese. “Kur do të ndalosh së vrari civilë?” dhe “Pse duhet t’u besojë Trump fjalëve të tua?” ishin vetëm disa nga thirrjet që u dëgjuan mes zhurmës së kamerave dhe mikrofonëve.

Megjithatë, Putin nuk dha asnjë përgjigje dhe zgjodhi të heshtë, duke ruajtur një qëndrim të ngurtë, ndërsa gazetarët do të duhet të presin përfundimin e samitit për të mësuar nëse bisedimet do të sjellin një armëpushim apo nëse Kremlini do të vijojë me ofensivën e tij në Ukrainë.

Ky episod e thekson edhe më shumë tensionin që e shoqëron këtë samit, ku pritet të diskutohet për një nga konfliktet më të përgjakshme dhe më të rëndësishme të dekadës së fundit.