Me pikëllim të thellë është bërë e ditur ndarja e parakohshme nga jeta e Greta Kryeziut, drejtoreshë e shëndetësisë në qytetin e Kamenicës.

Lajmi është konfirmuar nga Oda e Farmacistëve të Kosovës, e cila në një njoftim publik ka shprehur dhimbjen e madhe për humbjen e një anëtareje të çmuar të komunitetit farmaceutik.

“Pavarësisht mobilizimit të menjëhershëm dhe mbështetjes së madhe nga të gjithë ju — kolegë, miq e njerëz të mirë — Greta nuk arriti ta fitojë këtë betejë të padrejtë me jetën. Humbëm një kolege të përkushtuar, një shpirt të mirë, një mike të dashur që do të na mungojë pafundësisht në çdo hap,” – thuhet në reagimin e Odës së Farmacistëve.

Në këtë moment të rëndë, Oda ka shprehur ngushëllimet më të sinqerta për familjen Kryeziu, të afërmit, miqtë dhe të gjithë ata që patën fatin ta njihnin Gretën.

Greta Kryeziu do të kujtohet si një profesioniste e përkushtuar, një mike e dashur dhe një njeri me vlera të rralla, që la gjurmë të thella në shëndetësinë e Kamenicës.