Një ngjarje e rëndë ka tronditur Romën, ku një guidë turistike ka humbur jetën teksa punonte në Koloseum. Sipas mediave italiane, Giovanna Maria Giomarino u sëmur papritur gjatë kryerjes së detyrës, por pavarësisht përpjekjeve të kolegëve dhe ndihmës së shpejtë në Parkun Arkeologjik, ajo nuk mundi të mbijetonte.

Ngjarja ka ngjallur indinjatë edhe për mënyrën se si u menaxhua situata. Konfederata e Përgjithshme Italiane e Punës (CGIL) ka kritikuar autoritetet për mospezullimin e punës dhe rihapjen e menjëhershme të monumentit për vizitorët, pak pas tragjedisë.

“Ndërsa presim sqarime mbi shkakun e vdekjes, shprehim ngushëllimet më të thella për ndarjen nga jeta të Giovanna Maria-s dhe solidaritetin tonë për familjen e saj,” – thuhet në deklaratën e sindikatës, e cila thekson nevojën për përmirësimin e kushteve të punës në sektorin kulturor.

Edhe Ministria italiane e Turizmit ka shprehur hidhërim të thellë për humbjen. Ministrja Daniela Santanchè e cilësoi Giomarino-n si një profesioniste të përkushtuar, duke theksuar se “është detyrë e institucioneve të garantojnë kushte të sigurta pune dhe të nderojnë sakrificën e tyre.”

Vdekja e Giomarino-s i shtohet një liste të gjatë të viktimave që humbin jetën në vendin e punës, ndërsa debati mbi sigurinë dhe kushtet e punës në monumentet historike të Italisë pritet të ndizet sërish.