Brçko, Bosnje dhe Hercegovinë – Një ngjarje e pazakontë ka tronditur qytetin e Brçkos, ku një inspektor policie humbi jetën pas një tentative të dështuar grabitjeje në apartamentin e ish-bashkëshortit të të dashurës së tij.

Sipas policisë, oficeri kishte hyrë në apartament duke përdorur çelësin origjinal dhe tentoi të grabiste ish-burrin e partneres së tij, pronar i një dyqani bizhuterish. Hetimet paraprake dyshojnë se ngjarja lidhet me hakmarrje, pasi divorci mes çiftit nuk kishte përfunduar mirë.

Gjatë largimit nga vendi i ngjarjes, inspektori tentoi të arratisej duke dalë nga dritarja, por ra nga kati i lartë dhe ndërroi jetë. Trupi i tij u gjet në rrugë nga oficerët e tjerë, të cilët fillimisht nuk e kishin identifikuar.

Në makinën e viktimës, policia gjeti të dashurën e tij, ish-gruan e pronarit të apartamentit, e cila dyshohet se ka qenë e përfshirë në planin e grabitjes.

Hetuesit gjetën në apartament gjëra të shpërndara, një kasafortë të dëmtuar dhe gjurmë të qarta të tentativës për vjedhje. Interesant është fakti se tre muaj më parë, i njëjti apartament kishte qenë shënjestër e një vjedhjeje të ngjashme – një rast që ishte hetuar pikërisht nga inspektori tani i ndjerë.

Policia e Brçkos, nën mbikëqyrjen e prokurorisë, po vijon hetimet për të zbardhur të gjitha rrethanat e këtij rasti të ndërlikuar, që ka tronditur opinionin publik.