Milano – Igli Tare po ndërton një Milan të ri, të mbushur me talente të rinj, por duket se drejtuesi sportiv kuqezi kërkon të shtojë edhe një element me eksperiencë në prapavijë. Berat Gjimshiti, mbrojtësi i Kombëtares shqiptare, është një prej emrave që ka piketuar Tare për të sjellë stabilitet dhe profesionalizëm në Serinë A.

Pavarësisht afrimeve të fundit në mbrojtje, mediat pranë klubit raportojnë se Gjimshiti mbetet në listën e dëshirave të Milanit, falë njohjes së mirë të stilit të klubit dhe përvojës së tij në Serinë A, që mund të ndihmojë të rinjtë në skuadër.

Sidoqoftë, formula e transferimit mund të jetë komplekse. Tare synon ta përfshijë mbrojtësin në negociatat për Junus Musah, i cili po lëviz drejt Atalantës. Amerikani nuk është titullar i Alegrit, dhe Milani kërkon të përfitojë maksimalisht nga kjo situatë.

Atalanta ka ofruar 25 milionë euro për Musah, ndërsa Milani kërkon 30 milionë euro, duke parë se e bleu lojtarin dy vite më parë për pak më shumë se 21 milionë. Tare shpreson të përfshijë në paketë edhe kartonin e Gjimshitit, duke e konsideruar si një shtesë me eksperiencë që mund të forcojë prapavijën e kuqezinjve në këtë fazë rinovimi.

Gjithçka duket se po formësohet me kujdes, ndërsa Milani synon të ndërtojë një ekip që kombinon të rinjtë ambiciozë me veteranët e përgatitur, në kërkim të një sezoni konkurrues në Serie A.