Kiev – Një nga skenarët për të dhënë fund konfliktit me Rusinë mund të jetë ngrirja e armiqësive përgjatë vijave ekzistuese të frontit, sipas Mikhail Podoliak, këshilltar i lartë i presidentit ukrainas, Volodymyr Zelensky.

Në një intervistë për gazetën italiane La Repubblica, Podoliak shpjegoi se kjo do të nënkuptonte që disa territore të mbeteshin de facto nën kontroll rus, ndërsa de jure ato nuk do të njiheshin si pjesë e Rusisë. Ai shtoi se do të duheshin përpjekje të mëdha ekonomike dhe diplomatike për t’i rimarrë ato në të ardhmen.

Podoliak gjithashtu theksoi se në një skenar të tillë, Ukraina mund të angazhohej në një aleancë të re, jo domosdoshmërisht NATO, por një bashkëpunim me disa vende për të garantuar sigurinë. Ai njoftoi se diskutime për vendosjen e kontingjenteve ushtarake ukrainase me pjesëmarrjen e vendeve të tjera, përfshirë Francën, janë duke u zhvilluar me rreth dhjetë vende.

Ky propozim vjen ndërsa konflikti vijon të shkaktojë tensione të mëdha në rajon, duke nxitur debatin për rrugën më të mundshme drejt paqes.