Presidenti Donald Trump nënshkroi një urdhër ekzekutiv që ngarkon Departamentin e Drejtësisë të hetojë dhe ndëshkojë rastet e djegies së flamurit amerikan. Sipas urdhrit, kushdo që djeg flamurin do të akuzohet për nxitje të trazirave dhe mund të dënohet me një vit burg pa mundësi lirimi të parakohshëm.
Trump e përshkroi djegien e flamurit si akt që nxit trazira “që nuk janë parë kurrë më parë” dhe theksoi se masa nuk bie ndesh me Amendamentin e Parë të Kushtetutës, i cili mbron lirinë e shprehjes. Megjithatë, kritikat nuk munguan, duke kujtuar një vendim të vitit 1989 të Gjykatës Supreme, sipas të cilit djegia e flamurit përbën “fjalim simbolik” dhe mbrohet ligjërisht si formë e shprehjes politike, duke rrëzuar ligjet që ndalonin këtë veprim në 48 shtete.
Trump ka mbështetur prej kohësh kriminalizimin e djegies së flamurit, që nga viti 2016, duke propozuar masa që shkojnë nga humbja e shtetësisë deri tek dënimi me burg. Sondazhet e opinionit publik tregojnë një mbështetje të ndarë: në 2020, rreth gjysma e amerikanëve ishin pro ndalimit të djegies së flamurit, ndërsa në vitin 2023 59% e amerikanëve e konsiderojnë këtë akt të papranueshëm, duke reflektuar një qëndrim më të ashpër ndaj kësaj praktike gjatë protestave.
