Metodat e vjetra për të ndalur lemzën – nga mbajtja e frymës te frikësimi i papritur – shpesh rezultonin joefektive, por tani shkenca ka gjetur një zgjidhje praktike dhe të shpejtë. Një patentë e quajtur “HiccAway” prezanton një kashtë speciale në formën e shkronjës “G”, me valvul të vogël në fund, e cila ndalon lemzën menjëherë.

Përdorimi i saj rrit rezistencën gjatë tërheqjes së lëngut, duke detyruar diafragmën dhe nervin frenik të punojnë më shumë, ndërsa akti i gëlltitjes aktivizon nervin pneumogastrik. Kështu dy nervat kryesorë që shkaktojnë lemzën “të zënë” dhe fenomeni ndalet.

Studimi mbi efektivitetin e HiccAway, i kryer me 249 vullnetarë, tregoi se në 92% të rasteve lemza u ndal menjëherë. Nëntë nga dhjetë pjesëmarrës u shprehën se preferonin kashtën e patentuar më shumë se çdo ilaç apo metodë tradicionale kundër lemzës.

Dr. Ali Seifi nga Universiteti i Teksasit, një nga autorët e patentës, thekson se efekti është i menjëhershëm dhe HiccAway mund të konsiderohet zgjidhja më e re dhe më praktike për një problem që shqetëson të gjithë. Për ata që vuajnë shpesh nga lemza, kjo kashtë ofron një alternativë efektive që kursen kohë dhe bezdi.