Një ngjarje e rëndë ka tronditur mbrëmjen e sotme fshatin Abat, në njësinë administrative Shalë të Shkodrës, ku një 61-vjeçar u vra me armë zjarri pas një konflikti të hershëm për pronësinë e tokës.
Viktima është identifikuar si Piro Prroni, banues prej vitesh në Tiranë, ndërsa autor i dyshuar i krimit është Ndoc Maçaj, bashkëfshatar i tij.
Sipas burimeve nga grupi hetimor, mes dy personave ka pasur përplasje të vazhdueshme për më shumë se 10 vite, të cilat u rikthyen së fundmi për shkak të procesit të regjistrimit të tokave që ka nisur në zonën e Shalës dhe në disa njësi administrative të Shkodrës. Ky proces ka shtuar tensionet dhe ka rindezur konfliktet për pronësinë e parcelave.
Policia dhe grupi hetimor ndodhen në vendin e ngjarjes për mbledhjen e provave dhe po vijojnë kërkimet për kapjen e autorit të dyshuar.
