Pasditen e sotme, Durrësi u përfshi nga një stuhi e fuqishme me erëra të forta dhe reshje të dendura shiu, duke shkaktuar një ndryshim të menjëhershëm të kushteve atmosferike dhe duke detyruar qytetarët dhe pushuesit të largohen nga plazhet.

Brenda pak minutash, aktivitetet e pasdites u ndërprenë, ndërsa vizitorët që po shijonin ditët e fundit të gushtit u detyruan të futen në ambiente të mbyllura për t’u mbrojtur nga moti i keq. Plazhet u zbrazën, duke krijuar një pamje të pazakontë për këtë periudhë të sezonit turistik.

Banorët e Durrësit tregojnë se fenomeni nuk është i pazakontë dhe e quajnë këtë periudhë “fryma e vjeshtës”, një paralajmërim i hershëm për fundin e sezonit veror dhe ndryshimin gradual të klimës.

Meteorologët parashikojnë që reshjet dhe erërat e forta do të vazhdojnë edhe për disa orë, ndaj qytetarët dhe pushuesit këshillohen të marrin masa sigurie dhe të shmangin aktivitetet në plazh.