Udhëheqësi kinez Xi Jinping dhe kryeministri indian Narendra Modi u takuan të dielën në Tianjin, ku u zotuan të zgjidhin mosmarrëveshjet kufitare dhe të nxisin bashkëpunimin dypalësh. Takimi zhvillohet përpara hapjes së samiti rajonal të Organizatës së Bashkëpunimit të Shangait (SCO), një strukturë politike, ekonomike dhe sigurie e themeluar nga Kina.

Vizita e Modit në Kinë është e para që prej vitit 2020, kur marrëdhëniet mes dy vendeve u tensionuan pas përleshjeve të përgjakshme midis trupave indiane dhe kineze në kufi.

Në fjalën e tij hapëse, Modi tha se raportet me Kinën kanë hyrë në “një drejtim kuptimplotë”, duke theksuar se aktualisht “ekziston një mjedis paqësor në kufij pas shkëputjes”.

Nga ana tjetër, Xi Jinping deklaroi se shpreson që ky takim të shënojë një kthesë pozitive në marrëdhëniet mes dy vendeve:

“Palët nuk duhet të lejojnë që çështja e kufirit të përcaktojë marrëdhënien e përgjithshme Kinë-Indi. Zhvillimi ekonomik për të dyja vendet duhet të jetë fokusi kryesor.”

Xi theksoi gjithashtu rëndësinë e partneritetit strategjik:

“Për sa kohë që të dy vendet mbeten të përkushtuara për të qenë partnerë, jo rivalë, dhe për të ofruar mundësi zhvillimi, jo kërcënime, marrëdhëniet Kinë-Indi do të lulëzojnë dhe do të ecin përpara në mënyrë të qëndrueshme.”

Takimi pritet të ketë ndikim të madh në ekuilibrat rajonalë dhe në rolin e dy fuqive aziatike brenda SCO-së, veçanërisht në fushat e sigurisë, tregtisë dhe bashkëpunimit ekonomik.