Shteti amerikan i Teksasit ka hyrë në një front të ri debatues, duke vendosur një ndalim dy-vjeçar për prodhimin, përpunimin, posedimin dhe shitjen e mishit të rritur në laborator. Ligji hyri në fuqi më 1 shtator, duke i dhënë mbështetje industrisë tradicionale të bagëtive në një nga shtetet më të mëdha prodhuese të mishit të viçit në SHBA.

Mbështetësit e ligjit argumentojnë se masa mbron bujqësinë tradicionale dhe vendet e punës, ndërsa kritikët e cilësojnë ndalimin si proteksionist dhe jokushtetues, duke kufizuar zgjedhjen e konsumatorit dhe inovacionin. Deri më tani, vetëm një restorant në Austin, Otoko, ofronte mish të rritur në laborator.

Procesi i prodhimit të mishit të qelizave, i njohur gjithashtu si mish i kultivuar, përdor qeliza burimore shtazore që shumohen në bioreaktorë, duke krijuar mish pa therur kafshë. Mbështetësit argumentojnë se ky lloj prodhimi mund të rrisë sigurinë ushqimore dhe të jetë më i mirë për mirëqenien e kafshëve, ndërsa kundërshtarët thonë se mund të dëmtojë bujqësinë tradicionale.

Carl Ray Polk Jr., president i Shoqatës së Rritësve të Bagëtive të Teksasit dhe Jugperëndimit, vlerësoi projektligjin:
“Bermerët në të gjithë Teksasin punojnë pa u lodhur për të rritur bagëti të shëndetshme dhe për të prodhuar mish viçi me cilësi të lartë. Shoqata jonë është mirënjohëse për ata ligjvënës që votuan për të mbështetur këtë legjislacion dhe e kuptuan thelbin e këtij projektligji – për të mbrojtur konsumatorët tanë, industrinë e mishit të viçit dhe bujqësinë blegtorale.”

Ligji ngjalli tashmë shqetësime kushtetuese, duke u krahasuar me ndalimin e ngjashëm të Floridës vitin e kaluar, ku një gjykatë federale vendosi se masat mund të favorizonin prodhuesit lokalë në mënyrë jokushtetuese.

Ky vendim i Teksasit ngre pyetje të mëdha për të ardhmen e mishit të laboratorit dhe mund të nxisë sfida të reja ligjore në nivel kombëtar.