Autoritetet amerikane kanë kryer një operacion masiv kundër punësimit të paligjshëm, duke arrestuar 475 persona, shumica shtetas koreano-jugor, gjatë bastisjes së një fabrike të përbashkët Hyundai dhe LG Energy Solution në Xhorxhia.

Sipas Departamentit të Sigurisë së Brendshme, personat e arrestuar punonin ilegalisht, duke shkelur rregullat për vizat afatshkurtra dhe rekreative. “Njerëzit me viza afatshkurtra ose rekreative nuk janë të autorizuar të punojnë në SHBA,” tha zyra e Imigracionit dhe Doganave (ICE), duke nënvizuar rëndësinë e bastisjes për të mbrojtur vendet e punës amerikane.

Presidenti Donald Trump mbrojti operacionin, duke e përshkruar si një veprim të nevojshëm për të garantuar zbatimin e ligjit dhe ruajtjen e tregut të punës.

Arrestimet kanë shkaktuar alarm në Seul, ku zyrtarët e qeverisë thanë se do të ketë një “përgjigje të plotë” ndaj këtij veprimi. Ministri i Jashtëm Cho Hyun organizoi një takim urgjent dhe konfirmoi ngritjen e një ekipi për të ndjekur çështjen.

Ndërkohë, LG Energy Solution ka pezulluar shumicën e udhëtimeve të biznesit drejt SHBA-së dhe po punon për lirimin e shpejtë të të ndaluarve. Ngjarja ka tensionuar marrëdhëniet mes dy vendeve aleate dhe rrezikon të ndikojë në bisedimet ekonomike dhe tregtare në zhvillim.