Tiranë – Një ngjarje e rëndë ka tronditur mëngjesin e sotëm kryeqytetin, ku një 29-vjeçar plagosi me thikë dy vëllezërit e tij më të vegjël, pas një konflikti të çastit në zonën e Paskuqanit.

Sipas policisë, ngjarja ndodhi rreth orës 11:00, kur Elis Miftari, 29 vjeç, pas një sherri për motive të dobëta, goditi disa herë me thikë vëllezërit e tij, Zenel Miftari, 27 vjeç, dhe Alfrons Miftari, 20 vjeç.

Pas sulmit, autori tentoi të arratisej, por shërbimet e Komisariatit Nr. 5 ndërhynë menjëherë dhe e arrestuan pranë vendngjarjes. Ai është shoqëruar në komisariat dhe po merret në pyetje.

Gjendja e viktimave

Dy të plagosurit u dërguan me urgjencë në spital dhe, sipas mjekëve, ndodhen jashtë rrezikut për jetën, megjithëse kanë marrë plagë të shumta nga goditjet me thikë.

Policia: Hetimet vijojnë

Grupi hetimor po punon për të zbardhur dinamikën e plotë të ngjarjes, ndërsa materialet procedurale i janë kaluar Prokurorisë së Tiranës. Autori pritet të përballet me akuza të rënda për plagosje të rëndë me dashje.